21:1quod cum audisset Chananeus rex Arad qui habitabat ad meridiem venisse scilicet Israhel per exploratorum viam pugnavit contra illum et victor existens duxit ex eo praedam
21:2at Israhel voto se Domino obligans ait si tradideris populum istum in manu mea delebo urbes eius
21:3exaudivitque Dominus preces Israhel et tradidit Chananeum quem ille interfecit subversis urbibus eius et vocavit nomen loci illius Horma id est anathema
21:4profecti sunt autem et de monte Or per viam quae ducit ad mare Rubrum ut circumirent terram Edom et taedere coepit populum itineris ac laboris
21:5locutusque contra Deum et Mosen ait cur eduxisti nos de Aegypto ut moreremur in solitudine deest panis non sunt aquae anima nostra iam nausiat super cibo isto levissimo
21:6quam ob rem misit Dominus in populum ignitos serpentes ad quorum plagas et mortes plurimorum
21:7venerunt ad Mosen atque dixerunt peccavimus quia locuti sumus contra Dominum et te ora ut tollat a nobis serpentes oravit Moses pro populo
21:8et locutus est Dominus ad eum fac serpentem et pone eum pro signo qui percussus aspexerit eum vivet
21:9fecit ergo Moses serpentem aeneum et posuit pro signo quem cum percussi aspicerent sanabantur
21:10profectique filii Israhel castrametati sunt in Oboth
21:11unde egressi fixere tentoria in Hieabarim in solitudine quae respicit Moab contra orientalem plagam
21:12et inde moventes venerunt ad torrentem Zared
21:13quem relinquentes castrametati sunt contra Arnon quae est in deserto et prominet in finibus Amorrei siquidem Arnon terminus est Moab dividens Moabitas et Amorreos
21:14unde dicitur in libro bellorum Domini sicut fecit in mari Rubro sic faciet in torrentibus Arnon
21:15scopuli torrentium inclinati sunt ut requiescerent in Ar et recumberent in finibus Moabitarum
21:16ex eo loco apparuit puteus super quo locutus est Dominus ad Mosen congrega populum et dabo ei aquam
21:17tunc cecinit Israhel carmen istud ascendat puteus concinebant
21:18puteus quem foderunt principes et paraverunt duces multitudinis in datore legis et in baculis suis de solitudine Matthana
21:19de Matthana Nahalihel de Nahalihel in Bamoth
21:20de Bamoth vallis est in regione Moab in vertice Phasga et quod respicit contra desertum
21:21misit autem Israhel nuntios ad Seon regem Amorreorum dicens
21:22obsecro ut transire mihi liceat per terram tuam non declinabimus in agros et vineas non bibemus aquas ex puteis via regia gradiemur donec transeamus terminos tuos
21:23qui concedere noluit ut transiret Israhel per fines suos quin potius exercitu congregato egressus est obviam in desertum et venit in Iasa pugnavitque contra eum
21:24a quo percussus est in ore gladii et possessa est terra eius ab Arnon usque Iebboc et filios Ammon quia forti praesidio tenebantur termini Ammanitarum
21:25tulit ergo Israhel omnes civitates eius et habitavit in urbibus Amorrei in Esebon scilicet et viculis eius
21:26urbs Esebon fuit regis Seon Amorrei qui pugnavit contra regem Moab et tulit omnem terram quae dicionis illius fuerat usque Arnon
21:27idcirco dicitur in proverbio venite in Esebon aedificetur et construatur civitas Seon
21:28ignis egressus est de Esebon flamma de oppido Seon et devoravit Ar Moabitarum et habitatores excelsorum Arnon
21:29vae tibi Moab peristi popule Chamos dedit filios eius in fugam et filias in captivitatem regi Amorreorum Seon
21:30iugum ipsorum disperiit ab Esebon usque Dibon lassi pervenerunt in Nophe et usque Medaba
21:31habitavit itaque Israhel in terra Amorrei
21:32misitque Moses qui explorarent Iazer cuius ceperunt viculos et possederunt habitatores
21:33verteruntque se et ascenderunt per viam Basan et occurrit eis Og rex Basan cum omni populo suo pugnaturus in Edrai
21:34dixitque Dominus ad Mosen ne timeas eum quia in manu tua tradidi illum et omnem populum ac terram eius faciesque illi sicut fecisti Seon regi Amorreorum habitatori Esebon
21:35percusserunt igitur et hunc cum filiis suis universumque populum eius usque ad internicionem et possederunt terram illius
22:1profectique castrametati sunt in campestribus Moab ubi trans Iordanem Hierichus sita est
22:2videns autem Balac filius Sepphor omnia quae fecerat Israhel Amorreo
22:3et quod pertimuissent eum Moabitae et impetum eius ferre non possent
22:4dixit ad maiores natu Madian ita delebit hic populus omnes qui in nostris finibus commorantur quomodo solet bos herbas usque ad radices carpere ipse erat eo tempore rex in Moab
22:5misit ergo nuntios ad Balaam filium Beor ariolum qui habitabat super flumen terrae filiorum Ammon ut vocarent eum et dicerent ecce egressus est populus ex Aegypto qui operuit superficiem terrae sedens contra me
22:6veni igitur et maledic populo huic quia fortior me est si quo modo possim percutere et eicere eum de terra mea novi enim quod benedictus sit cui benedixeris et maledictus in quem maledicta congesseris
22:7perrexerunt seniores Moab et maiores natu Madian habentes divinationis pretium in manibus cumque venissent ad Balaam et narrassent ei omnia verba Balac
22:8ille respondit manete hic nocte et respondebo quicquid mihi dixerit Dominus manentibus illis apud Balaam venit Deus et ait ad eum
22:9quid sibi volunt homines isti apud te
22:10respondit Balac filius Sepphor rex Moabitarum misit ad me
22:11dicens ecce populus qui egressus est de Aegypto operuit superficiem terrae veni et maledic ei si quo modo possim pugnans abicere eum
22:12dixitque Deus ad Balaam noli ire cum eis neque maledicas populo quia benedictus est
22:13qui mane consurgens dixit ad principes ite in terram vestram quia prohibuit me Deus venire vobiscum
22:14reversi principes dixerunt ad Balac noluit Balaam venire nobiscum
22:15rursum ille multo plures et nobiliores quam ante miserat misit
22:16qui cum venissent ad Balaam dixerunt sic dicit Balac filius Sepphor ne cuncteris venire ad me
22:17paratum honorare te et quicquid volueris dare veni et maledic populo isti
22:18respondit Balaam si dederit mihi Balac plenam domum suam argenti et auri non potero inmutare verbum Domini Dei mei ut vel plus vel minus loquar
22:19obsecro ut hic maneatis etiam hac nocte et scire queam quid mihi rursum respondeat Dominus
22:20venit ergo Deus ad Balaam nocte et ait ei si vocare te venerunt homines isti surge et vade cum eis ita dumtaxat ut quod tibi praecepero facias
22:21surrexit Balaam mane et strata asina profectus est cum eis
22:22et iratus est Deus stetitque angelus Domini in via contra Balaam qui sedebat asinae et duos pueros habebat secum
22:23cernens asina angelum stantem in via evaginato gladio avertit se de itinere et ibat per agrum quam cum verberaret Balaam et vellet ad semitam reducere
22:24stetit angelus in angustiis duarum maceriarum quibus vineae cingebantur
22:25quem videns asina iunxit se parieti et adtrivit sedentis pedem at ille iterum verberabat
22:26et nihilominus angelus ad locum angustum transiens ubi nec ad dextram nec ad sinistram poterat deviari obvius stetit
22:27cumque vidisset asina stantem angelum concidit sub pedibus sedentis qui iratus vehementius caedebat fuste latera
22:28aperuitque Dominus os asinae et locuta est quid feci tibi cur percutis me ecce iam tertio
22:29respondit Balaam quia commeruisti et inlusisti mihi utinam haberem gladium ut te percuterem
22:30dixit asina nonne animal tuum sum cui semper sedere consuesti usque in praesentem diem dic quid simile umquam fecerim tibi at ille ait numquam
22:31protinus aperuit Dominus oculos Balaam et vidit angelum stantem in via evaginato gladio adoravitque eum pronus in terram
22:32cui angelus cur inquit tertio verberas asinam tuam ego veni ut adversarer tibi quia perversa est via tua mihique contraria
22:33et nisi asina declinasset de via dans locum resistenti te occidissem et illa viveret
22:34dixit Balaam peccavi nesciens quod tu stares contra me et nunc si displicet tibi ut vadam revertar
22:35ait angelus vade cum istis et cave ne aliud quam praecepero tibi loquaris ivit igitur cum principibus
22:36quod cum audisset Balac egressus est in occursum eius in oppido Moabitarum quod situm est in extremis finibus Arnon
22:37dixitque ad Balaam misi nuntios ut vocarent te cur non statim venisti ad me an quia mercedem adventui tuo reddere nequeo
22:38cui ille respondit ecce adsum numquid loqui potero aliud nisi quod Deus posuerit in ore meo
22:39perrexerunt ergo simul et venerunt in urbem quae in extremis regni eius finibus erat
22:40cumque occidisset Balac boves et oves misit ad Balaam et principes qui cum eo erant munera
22:41mane autem facto duxit eum ad excelsa Baal et intuitus est extremam partem populi
23:1dixitque Balaam ad Balac aedifica mihi hic septem aras et para totidem vitulos eiusdemque numeri arietes
23:2cumque fecisset iuxta sermonem Balaam inposuerunt simul vitulum et arietem super aram
23:3dixitque Balaam ad Balac sta paulisper iuxta holocaustum tuum donec vadam si forte occurrat mihi Dominus et quodcumque imperaverit loquar tibi
23:4cumque abisset velociter occurrit ei Deus locutusque ad eum Balaam septem inquit aras erexi et inposui vitulum et arietem desuper
23:5Dominus autem posuit verbum in ore eius et ait revertere ad Balac et haec loqueris
23:6reversus invenit stantem Balac iuxta holocaustum suum et omnes principes Moabitarum
23:7adsumptaque parabola sua dixit de Aram adduxit me Balac rex Moabitarum de montibus orientis veni inquit et maledic Iacob propera et detestare Israhel
23:8quomodo maledicam cui non maledixit Deus qua ratione detester quem Dominus non detestatur
23:9de summis silicibus videbo eum et de collibus considerabo illum populus solus habitabit et inter gentes non reputabitur
23:10quis dinumerare possit pulverem Iacob et nosse numerum stirpis Israhel moriatur anima mea morte iustorum et fiant novissima mea horum similia
23:11dixitque Balac ad Balaam quid est hoc quod agis ut malediceres inimicis vocavi te et tu e contrario benedicis eis
23:12cui ille respondit num aliud possum loqui nisi quod iusserit Dominus
23:13dixit ergo Balac veni mecum in alterum locum unde partem Israhelis videas et totum videre non possis inde maledicito ei
23:14cumque duxisset eum in locum sublimem super verticem montis Phasga aedificavit Balaam septem aras et inpositis supra vitulo atque ariete
23:15dixit ad Balac sta hic iuxta holocaustum tuum donec ego pergam obvius
23:16cui cum Dominus occurrisset posuissetque verbum in ore eius ait revertere ad Balac et haec loqueris ei
23:17reversus invenit eum stantem iuxta holocaustum suum et principes Moabitarum cum eo ad quem Balac quid inquit locutus est Dominus
23:18at ille adsumpta parabola sua ait sta Balac et ausculta audi fili Sepphor
23:19non est Deus quasi homo ut mentiatur nec ut filius hominis ut mutetur dixit ergo et non faciet locutus est et non implebit
23:20ad benedicendum adductus sum benedictionem prohibere non valeo
23:21non est idolum in Iacob nec videtur simulacrum in Israhel Dominus Deus eius cum eo est et clangor victoriae regis in illo
23:22Deus eduxit eum de Aegypto cuius fortitudo similis est rinocerotis
23:23non est augurium in Iacob nec divinatio in Israhel temporibus suis dicetur Iacob et Israheli quid operatus sit Deus
23:24ecce populus ut leaena consurget et quasi leo erigetur non accubabit donec devoret praedam et occisorum sanguinem bibat
23:25dixitque Balac ad Balaam nec maledicas ei nec benedicas
23:26et ille nonne ait dixi tibi quod quicquid mihi Deus imperaret hoc facerem
23:27et ait Balac ad eum veni et ducam te ad alium locum si forte placeat Deo ut inde maledicas eis
23:28cumque duxisset eum super verticem montis Phogor qui respicit solitudinem
23:29dixit ei Balaam aedifica mihi hic septem aras et para totidem vitulos eiusdemque numeri arietes
23:30fecit Balac ut Balaam dixerat inposuitque vitulos et arietes per singulas aras
24:1cumque vidisset Balaam quod placeret Domino ut benediceret Israheli nequaquam abiit ut ante perrexerat ut augurium quaereret sed dirigens contra desertum vultum suum
24:2et elevans oculos vidit Israhel in tentoriis commorantem per tribus suas et inruente in se spiritu Dei
24:3adsumpta parabola ait dixit Balaam filius Beor dixit homo cuius obturatus est oculus
24:4dixit auditor sermonum Dei qui visionem Omnipotentis intuitus est qui cadit et sic aperiuntur oculi eius
24:5quam pulchra tabernacula tua Iacob et tentoria tua Israhel
24:6ut valles nemorosae ut horti iuxta fluvios inrigui ut tabernacula quae fixit Dominus quasi cedri propter aquas
24:7fluet aqua de situla eius et semen illius erit in aquas multas tolletur propter Agag rex eius et auferetur regnum illius
24:8Deus eduxit illum de Aegypto cuius fortitudo similis est rinocerotis devorabunt gentes hostes illius ossaque eorum confringent et perforabunt sagittis
24:9accubans dormivit ut leo et quasi leaena quam suscitare nullus audebit qui benedixerit tibi erit ipse benedictus qui maledixerit in maledictione reputabitur
24:10iratusque Balac contra Balaam conplosis manibus ait ad maledicendum inimicis meis vocavi te quibus e contrario tertio benedixisti
24:11revertere ad locum tuum decreveram quidem magnifice honorare te sed Dominus privavit te honore disposito
24:12respondit Balaam ad Balac nonne nuntiis tuis quos misisti ad me dixi
24:13si dederit mihi Balac plenam domum suam argenti et auri non potero praeterire sermonem Domini Dei mei ut vel boni quid vel mali proferam ex corde meo sed quicquid Dominus dixerit hoc loquar
24:14verumtamen pergens ad populum meum dabo consilium quid populus tuus huic populo faciat extremo tempore
24:15sumpta igitur parabola rursum ait dixit Balaam filius Beor dixit homo cuius obturatus est oculus
24:16dixit auditor sermonum Dei qui novit doctrinam Altissimi et visiones Omnipotentis videt qui cadens apertos habet oculos
24:17videbo eum sed non modo intuebor illum sed non prope orietur stella ex Iacob et consurget virga de Israhel et percutiet duces Moab vastabitque omnes filios Seth
24:18et erit Idumea possessio eius hereditas Seir cedet inimicis suis Israhel vero fortiter aget
24:19de Iacob erit qui dominetur et perdat reliquias civitatis
24:20cumque vidisset Amalech adsumens parabolam ait principium gentium Amalech cuius extrema perdentur
24:21vidit quoque Cineum et adsumpta parabola ait robustum est quidem habitaculum tuum sed si in petra posueris nidum tuum
24:22et fueris electus de stirpe Cain quamdiu poteris permanere Assur enim capiet te
24:23adsumptaque parabola iterum locutus est heu quis victurus est quando ista faciet Deus
24:24venient in trieribus de Italia superabunt Assyrios vastabuntque Hebraeos et ad extremum etiam ipsi peribunt
24:25surrexitque Balaam et reversus est in locum suum Balac quoque via qua venerat rediit